રશિયામાંથી થતી ખાતરની આયાત ત્રણ વર્ષમાં સૌથી વધુ

નવી દિલ્હી : સંસદ સમક્ષ રજૂ કરાયેલા ડેટા અનુસાર, ભારતે ચાલુ નાણાકીય વર્ષના એપ્રિલ-ફેબ્રુઆરી દરમિયાન રશિયામાંથી યુરિયા અને ડીએપી સહિત ૩૪.૧૯ લાખ ટન ખાતરની આયાત કરી હતી, જે છેલ્લા ત્રણ વર્ષમાં સૌથી વધુ છે. રશિયા-યુક્રેન યુદ્ધ છતાં આયાતમાં વધારો થયો છે.

ચાલુ વર્ષે ફેબ્રુઆરી સુધી (ચાલુ યુક્રેન યુદ્ધ દરમિયાન) યુરિયાની આયાત પાછલા વર્ષની સરખામણીમાં બમણીથી વધુ છે તેમ ખાતર રાજ્ય મંત્રીએ લોકસભામાં લેખિત જવાબમાં જણાવ્યું હતું. .

કુલ ૩૪.૧૯ લાખ ટન ખાતરની આયાતમાંથી, ચાલુ નાણાકીય વર્ષ ૨૦૨૨-૨૩ના ફેબ્રુઆરી સુધીમાં લગભગ ૬.૨૬ લાખ ટન યુરિયાની આયાત કરવામાં આવી હતી, જે અગાઉના સમગ્ર નાણાકીય વર્ષમાં ૨.૮૦ લાખ ટનની આયાત કરવામાં આવી હતી. યુરિયા ઉપરાંત, ડી-એમોનિયમ ફોસ્ફેટ (ડીએપી), મ્યુરિએટ ઓફ પોટાશ (એમઓપી) અને એનપીકે રશિયામાંથી આયાત કરાયેલા અન્ય ખાતરો હતા.

ચાલુ નાણાકીય વર્ષના એપ્રિલ-ફેબ્રુઆરી સમયગાળા દરમિયાન ડીએપીની આયાત ૭.૬૫ લાખ ટન, એમઓપી  ૦.૪૩ લાખ ટન અને એનપીકે ૧૯.૮૫ લાખ ટન હતી, ડેટા દર્શાવે છે.

રશિયામાંથી ૨૦૨૧-૨૨ના નાણાકીય વર્ષમાં કુલ ખાતરની આયાત ૧૯.૧૫ લાખ ટન, નાણાકીય વર્ષ ૨૦૨૦-૨૧ દરમિયાન ૧૯.૧૫ લાખ ટન અને ૨૦૧૯-૨૦ નાણાકીય વર્ષમાં ૧૧.૯૧ લાખ ટન હતી.

સ્થાનિક યુરિયા ઉત્પાદનને વેગ આપવા માટે સરકારે અનેક પગલાં લીધા છે. નવી રોકાણ નીતિ હેઠળ છ નવા યુરિયા યુનિટ સ્થાપવામાં આવ્યા છે. ૨૦૨૨-૨૩ની રવિ સિઝન દરમિયાન દેશમાં ખાતરોની ઉપલબ્ધતા આરામદાયક રહી છે. યુરિયા અને અન્ય ખાતરની માંગ અને ઉત્પાદન વચ્ચેનો તફાવત આયાત દ્વારા પૂરો થાય છે. 

ઈન્ટીગ્રેટેડ ફર્ટિલાઈઝર મોનિટરિંગ સિસ્ટમ નામની ઓનલાઈન વેબ-આધારિત મોનિટરિંગ સિસ્ટમ દ્વારા સમગ્ર દેશમાં તમામ મુખ્ય સબસિડીવાળા ખાતરોની હિલચાલ પર નજર રાખવામાં આવે છે.