– ઓપી જિંદાલ ગ્રુપના ચેરપર્સન સાવિત્રી જિંદાલ ભારતના સૌથી ધનિક મહિલા
નવી દિલ્હી, તા. 17 માર્ચ 2023, શુક્રવાર
સૌથી વધુ મહિલા અબજોપતિઓ ધરાવતા દેશોની યાદીમાં અમેરિકા ટોપ પર છે. સિટી ઈન્ડેક્સે આંતરરાષ્ટ્રીય મહિલા દિવસ પર તેના સંશોધનના આધારે આ યાદી તૈયાર કરી છે. આ યાદી બનાવવામાં ફોર્બ્સના લાઈવ બિલિયોનેર ટ્રેકરની પણ મદદ લેવામાં આવી છે. સિટી ઈન્ડેક્સ પ્રમાણે મહિલા અબજોપતિઓની યાદીમાં ભારત ઓસ્ટ્રેલિયા અને હોંગકોંગ સાથે સંયુક્ત રીતે પાંચમા સ્થાને છે. વિશ્વની 5 સૌથી ધનિક મહિલાઓમાંથી 4 અમેરિકાની છે. લોરિયલની માલકિન ફ્રાન્કોઈસ બેટનકોર્ટ મેયર્સ 81.49 બિલિયન ડોલરની સંપત્તિ સાથે વિશ્વની સૌથી ધનિક મહિલા છે. વોલમાર્ટની એલિસ વોલ્ટન 60.16 બિલિયન ડોલરની નેટવર્થ સાથે બીજા નંબરે છે.
અમેરિકામાં કુલ 92 અબજોપતિ મહિલાઓ છે. આ યાદીમાં બીજા સ્થાન પર ચીન છે. ચીનમાં અમેરિકાના મુકાબલે અબજોપતિઓની સંખ્યા અડધી એટલે કે, 46 છે. આ યાદીમાં ત્રીજા સ્થાને જર્મનીનું નામ છે. જર્મનીમાં કુલ 32 અબજોપતિ મહિલાઓ રહે છે. જર્મની પછી, નંબર ઇટાલીનો આવે છે. સિટી ઈન્ડેક્સમાં 16 અબજોપતિ મહિલાઓ સાથે ઈટાલી ચોથા ક્રમે છે. ભારતમાં 9 અબજપતિ મહિલાઓ છે. આ જ સંખ્યા ઓસ્ટ્રેલિયા અને હોંગકોંગમાં છે. આ રીતે આ યાદીમાં આ ત્રણમાંથી પાંચમો નંબર આવે છે.
ફોર્બ્સ રિચ લિસ્ટ 2022 પ્રમાણે ઓપી જિંદાલ ગ્રુપના ચેરપર્સન સાવિત્રી જિંદાલ ભારતના સૌથી ધનિક મહિલા છે. તેમની કુલ સંપત્તિ 16.96 બિલિયન ડોલર (લગભગ 14 હજાર કરોડ) છે. સાવિત્રી જિંદાલ એક સફળ બિઝનેસ વુમન હોવાની સાથે સાથે રાજકારણમાં પણ સક્રિય છે.
વિનોદ રાય ગુપ્તા
વિનોદ રાય ગુપ્તા ભારતની બીજી સૌથી ધનવાન મહિલા છે. તેઓ Havells Indiaના મેનેજિંગ ડાયરેક્ટર અનિલ ગુપ્તાની માતા છે. તેમની કુલ નેટવર્થ 6.3 બિલિયન ડોલર છે.
રેખા ઝુનઝુનવાલા
શેરબજારના બિલ બુલ કહેવાતા રોકાણકાર રાકેશ ઝુનઝુનવાલાની પત્ની રેખા ઝુનઝુનવાલા વર્ષ 2022 માટે ફોર્બ્સ ઈન્ડિયા રિચ પ્રમાણે ભારતની ત્રીજી સૌથી ધનિક મહિલા છે. તેમની કુલ નેટવર્થ 5.9 બિલિયન ડોલર છે.
ફાલ્ગુની નાયર
નાયકાની CEO ફાલ્ગુની નાયરનું નામ પણ ભારતની સૌથી ધનિક લોકોની લિસ્ટમાં સામેલ છે. તેમની કુલ સંપત્તિ 4.08 બિલિયન ડોલર છે.
લીના તિવારી
ફાર્મા અને બાયોટેક કંપની USV પ્રાઈવેટ લિમિટેડની માલકિન લીના તિવારી ભારતની પાંચમી સૌથી ધનિક મહિલા છે.
દિવ્યા ગોકુલનાથ
દિવ્યા ગોકુલનાથનું નામ પણ ભારતના દિગ્ગજ ટેક ઉદ્યોગપતિઓની યાદીમાં સામેલ છે. તેમણે વર્ષ 2011માં BYJU કંપનીની સ્થાપના કરી હતી. તેમની કુલ સંપત્તિ હાલમાં 3.6 બિલિયન ડોલર છે.
મલ્લિકા શ્રીનિવાસન
મલ્લિકા શ્રીનિવાસન ટ્રેક્ટર અને ફાર્મ ઈક્વિપમેન્ટ લિમિટેડના CEO છે. 2022ની ફોર્બ્સ ઈન્ડિયા રિચ લિસ્ટમાં પણ તેમનું નામ સામેલ છે. તેમની કુલ નેટવર્થ 3.4 બિલિયન ડોલર છે.
કિરણ મજૂમદાર-શો
બાયોકોન લિમિટેડ અને બાયોકોન બાયોલોજિક્સ લિમિટેડના સ્થાપક કિરણ મઝુમદાર-શોની કુલ નેટવર્થ 2.7 બિલિયન ડોલર છે. ભારતની ધનિક મહિલાઓની યાદીમાં તેમનું આઠમું સ્થાન છે.
અનુ આગા
વર્ષ 1996માં થર્મેક્સ કંપનીની સ્થાપના કરનાર અનુ આગાની નેટવર્થ 2.8 બિલિયન ડોલર છે.
