વિદેશ મંત્રાલયની બેઠકમાં રાહુલ ગાંધીએ તોડ્યું મૌન, કેમ્બ્રિજની સ્પીચમાં કંઈ વાંધાજનક નહોતું

રાહુલ ગાંધી તાજેતરમાં કેમ્બ્રિજની મુલાકાતે ગયા હતા. જ્યાં તેમણે મોદી સરકાર અંગે કરેલી ટિપ્પણીઓ પર ભારતમાં હોબાળો મચી ગયો હતો. સત્તા પક્ષ આ મામલે રાહુલ ગાંધીને દેશની માફી માગવા દબાણ કરી રહ્યું છે ત્યારે રાહુલ ગાંધી તેમના નિવેદન પર અડગ છે અને તેમણે કહી દીધું છે કે મારી સ્પીચમાં કંઈ જ વાંધાજનક નહોતું. 

વિદેશ મંત્રાલયની બેઠકમાં વિપક્ષ જોડાયો 

સંસદમાં ભારે હોબાળા વચ્ચે તાજેતરમાં વિદેશ મંત્રાલયની બેઠકમાં રાહુલ ગાંધી પણ સામેલ થયા હતા. તેમણે કહ્યું કે મારું નિવેદન એક વ્યક્તિ અંગે જ હતું. સરકાર કે પછી દેશને લઈને નહોતું. રાહુલે આ સફાઈ એવા સમયે આપી હતી જ્યારે ભાજપા સાંસદોએ ભારે હોબાળો મચાવી રાખ્યો છે. ભારતની જી૨૦ અધ્યક્ષતા અંગે આયોજિત વિદેશ મંત્રાલયની સંસદીય સલાહકાર સમિતિની બેઠક યોજાઈ હતી. આ બેઠકમાં રાહુલ ગાંધી અને વિપક્ષના તમામ નેતા હાજર હતા. આ દરમિયાન ભાજપ અને વિપક્ષના સાંસદો વચ્ચે તીખી ચર્ચા થઈ હતી. ભાજપે રાહુલ સામે આકરા પ્રહારો કર્યા હતા.